Stories

ಜುಮಾದಿ ಬಂಟೆ ( ವೀರ ದೇವುಪೊಂಜೆ )

ಪೂರ್ವೋಡು ದ್ವಾಪರಯುಗೋಟು "ದೂಮಸೂರೆ " ಪನ್ಪುನ ರಕ್ಕಸೆ ದೇವತೆಲೆಗ್ ಅನ್ಯಾಯ ಅಧರ್ಮ ಮಲ್ತ್ ಅಕ್ಲೆಗ್ ಚಿತ್ರಹಿಂಸೆ ಕೊರೊಂದು ಬದ್ಕರೆ ಬುಡೊಂದಿತ್ತಿಜೆ. ಆಯನ ಉಪದ್ರ ತಡೆವರೆ ಆವಂದೆ ದೇವತೆಲು ದೇವಿ ಜಗನ್ಮಾತೆನ್ ಒಲಿತ್ದ್ ದೂರು ಕೊರ್ಪೆರ್ . ಅಂಚೆನೇ ದೇವಿ ಉಗ್ರರೂಪ ಮಹಾಕಾಳಿನ ದೆತೊಂದು ದೂಮಸೂರನ್ ಸಂಹಾರ ಮಲ್ತ್ 'ದೂಮಾವತಿ ' ಪನ್ಪುನ ದೈವವಾದ್ ತುಳುನಾಡ್ಗ್ ಜತ್ತ್ ಬರ್ಪೊಲು . ಮೂಲು ದುಂಬುದ ಕಾಲೊಡು ಅರಸುಲೆನ ಆಸ್ಥಾನ ಇತ್ತಿನಲ್ಪ ನೆಲೆ ಆಧ್ ದುಷ್ಟರೆಗ್ ಶಿಕ್ಷೆ ಕೊರೊಂದು ಬಕ್ತೆರೆನ್ ರಕ್ಷಣೆ ಮಲ್ತ್ ಒಂಜೊಂಜಿ ಊರುಗ್ ಪೋನಗ ಬೇತೆ ಬೇತೆ ಪುದರ್ ಡ್ ಮೆರೆಯಿನ ಸತ್ಯ . ಸಾರಾಳ ಕಟ್ಟ್ ಗ್ ಪೋದು 'ಸಾರಾಳ ಜುಮಾದಿ' , ಅಜಿಲ ಸೀಮೆಡ್ 'ಕಾಂತೇರಿ ಜುಮಾದಿ', 'ಮರ್ಲಾರ ಜುಮಾದಿ', 'ಜುಮಾದಿ ಬಂಟೆ' ೦ದ್ ಪುಗಾರ್ತೆ ಪಡೆಯಿನ ದೈವ. ಕೈಲಾಸೊಡು ಈಶ್ವರ ದೇವೆರೆನ ವರ ದೆತೊಂದು ವರಮೂರ್ತಿಯಿಂದ್ ಪುಗರ್ತೆ ಪಡೆಯಿನ ಪಂಜುರ್ಲಿ ಭೂತ ' ಬಂಟೆ ' ಆದ್ ಜುಮಾದಿನ ಒಟ್ಟಿಗಿತ್ತೊಂದು ಆಯಗ್ ಮಧು ಮಾಸದ ಭೋಗ, ಅಪ್ಪೆ ಜುಮಾದಿಗ್ ಪೂ ಪನಿಯಾರದ ಬೋಗ ಕೊರೊಂದು ಉಲ್ಲ . ಅಂಚೆನೇ ಊರುಡು ಗ್ರಾಮೊಡು ರಾಜನ್ ದೈವಂದ್ ಲಾ ಕುಟುಮೊಡು ಗುತ್ತು ಬರ್ಕೆಲೆಡ್ ಇಲ್ಲೆಚ್ಚಿದ ದೈವಂದ್ ಲಾ ಸಾನ ಚಾವಡಿಡ್ ನಂಬೊಂದು ಒರ್ಸಗೋರ ಕೊಡಿ ಏರ್ದ್ ಊರುದ ನೇಮ, ಬಂಡಿ, ತೇರ್ ಒಯಿಪುನ ಕ್ರಮಲಾ ಉಂಡು. ಜುಮಾದಿ ಬಂಟೆ ಇತ್ತಿನ ಜಾಗೆಡ್ ನೇಮ ಆನಗ ಬಂಟನ ಪುದರ್ಡ್ ಕೋರಿ ಕಟ್ಟ ಪೂರ ಕಡೆಟ್ ಆಪುಂಡು. ತುಳುನಾಡ್ದ ಮೂಡಾಯಿಡ್ 'ಪೆರಿಂಜ ಗುತ್ತು 'ಡು ಮಂಜಣ ಪುಂಜೆ ಬೊಕ ತುಣಕುರು ಪೂಂಜೆದಿಗ್ ಒಂಜಿ ಆನ್ ಬಾಲೆ ಆಪುಂಡ್. to be continued...